Die nou reeds bekende C-kruis kom tree weer in ons gemeente op vanaf 27 Augustus. Maak seker jy woon hulle optrede by op 27 Augustus om 19:00 asook 29- 31 en Augustus en 1 September. Ons het ook mense nodig om die groep te huisves vir die week en om gesamentlike etes voor te berei. Skakel so gou as moontlik met Jaco van As (664-2149) of met Nelleke Gouws (6643581) indien jy kan help. Ons sal die baie hoog op prys stel!

Openbaring is seker die boek in die Bybel waaroor daar al die meeste nonsens geskryf en gepraat is. Maar wat was die oorspronklike boodskap van die boek? Voordat ons nie hierdie vraag kan antwoord nie kan ons moeilik die betekenis van die boek vir vandag peil. Nuwe navorsing oor die antieke tye het onlangs aan die lig gekom wat ons verstaan van die boek verhelder. 'n Reeks oor die verstaan van Openbaring word vanaf 13 Augustus om 19:00 tot en met 17 September (behalwe 27 Augustus) aangebied. Woon dit gerus by en nooi ook ander wat jy dink daarby kan baat vind.

Die mees eerlike mens kan in 'n oomblik van swakheid swig voor die versoeking om oneerlik te wees, veral as sy selfbeeld en ego op die spel is. Die sesde program in die Heartlines reeks handel hieroor.

Hierdie reeks is 'n inisiatief van die Mass Media Project. Die doel is om 'n landwye gesprek oor waardes aan die gang te sit. Elke program, wat op Sondae 20:00 op SABC 2 uitgesaai word, fokus telkens op 'n bepaalde waarde wat in die karakter van God gesetel is. Die uitdaging wat aan elke Suid-Afrikaner gerig word is om hierdie waardes in hulle lewens en in ons samelewing te vergestalt.(Die programme word ook deur die week herhaal - sien TV gidse vir die tye).

Klink op die datums hieronder om 'n opsomming van die program sowel as oordenkings- en besprekingsvrae te sien:
16 Julie Aanvaarding
23 Julie Verantwoordelikheid.
30 Julie Vergifnis
6 Augustus Volharding
13 Augustus Selfbeheersing
20 AugustusEerlikheid

Die belangrikste persone in 'n kind se lewe is sy/haar ouers. Te dikwels vergeet ons dit as dit kom by vorming van 'n kinds se geloofslewe. Baie ouers laat dit oor aan die kerk. Jim Burns, 'n kenner op hierdie gebied, stel 'n ander benadering voor. Hy bied op 2 en 3 Oktober 'n seminaar hieroor aan - beslis 'n moet vir elkeen wat 'n hart het vir die jeug. Vir meer inligting skakel Linda Landman by YouthNet: 018-290-9733

Teken asseblief 3 September om 12:00 in jou dagboek aan: al vier ons blokke kom dan bymekaar om sake van gemeenskaplike belang (onder andere veiligheid en sekuriteit) te bespreek. Clive Napier, raadslid, het onderneem om daar te wees. (Hy het ook baie moeite gedoen om ons behulpsaam te wees met die Parnkanval reëlings).

Nooi gerus ook jou bure - hierdie byeenkoms is nie net vir lidmate van ons gemeente nie. Bring 'n bordjie eetgoed saam en dan deel ons met mekaar.

George Barna ken die kerk! Die rede daarvoor is dat hy dié voorste navorser oor godsdiens en kerklike sake in Amerika is. Hy weet presies wat die nuutste tendense en bewegings op hierdie gebied is. En hy sê dat mense, alhoewel hulle nog steeds Christen-gelowiges sal bly, op groot skaal uit plaaslike gemeentes gaan beweeg ...