Wykstelsel
Die gemeente bestaan uit 14 wyke. (Een van hierdie wyke bestaan uit lidmate wat buite die grense van die gemeente woon.) Aan elke wyk is ‘n ouderling en diaken toegewys. Saam vorm die ouderlinge en die diakens (tesame met die leraars, omsieners en kommissie-voorssitters) die kerkraad.
Elke wyk bestaan uit ‘n gemiddeld van 20 huisgesinne / enkellopendes. (Ongeveer 50-60 lidmate) Om die ouderling en die diaken te help het elke wyk ook ‘n aantal dienswerkers. Elke dienswerker neem verantwoordelikheid vir ongeveer 4 -5 huisgesinne / enkellopendes (besoekpunte). Die stelsel kan as volg voorgestel word:
Die dienswerker se taak is om kontak te hou met elke besoekpunt wat aan hom/haar toegewys is en om die dankoffers in te samel. Die nood en behoeftes moet aan die ouderling en diaken en leraar deurgegee word. Dit is duidelik dat die dienswerker die senuwee-eindpunt van die kerkraad is. Sonder toegewyde dienswerkers kan die stelsel nie werk nie.
Bedieningspan
Die ouderling en die diaken en die dienswerkers in elke wyk vorm ‘n bedieningspan. Hierdie span kom gereeld bymekaar om bedieningsprobleme te bespreek en bedieningstrategie te beplan. Hierdie span tree ook gereeld vir elke lidmaat in die wyk in gebed by die Here in.
Die take van die ouderling
Ten einde sy sentrale taak uit te voer, moet die ouderling:
- gereeld (ten minste twee maal per jaar) by elke besoekpunt besoek aflê;
- gereeld kontak hou met die dienswerkers in sy/haar wyk
- lidmate aanmoedig om toegewyd aan die Here te leef;
- gereeld die siekes en ander noodlydendes besoek om hulle geestelik te bemoedig en te versterk;
- gereeld die kerkraadsvergaderings bywoon.
- toesig hou oor die bywoning van die kategese, inskakeling by mentorgroepe en bywoning van jeugbyeenkomste.
Die take van die diaken
Ten einde sy sentrale taak uit te voer, moet die diaken:
- gereeld (ten minste twee maal per jaar) by elke besoekpunt besoek aflê;
- lidmate aanmoedig tot barmhartigheids-diens teenoor mekaar deur betrokke te raak by mekaar en vir mekaar om te gee;
- lidmate in nood by te staan en te help;
- gereeld kontak maak met die dienswerkers in sy/haar wyk
- gereeld die kerkraadsvergaderings bywoon;
- die nagmaal bedien en die dankoffer tydens die erediens insamel;
- die maandelikse dankoffers van die dienswerkers te ontvang en by die saakgelastigde in te betaal.
Die take van die dienswerker
Die dienswerker dien as ‘n hulp vir die ouderling en die diaken en as skakel tussen die lidmaat en die kerkraad. Die dienswerker moet:
- ten minste een maal per maand by elke besoekpunt besoek aflê
- die dankoffers insamel en by die diaken inbetaal;
- op hoogte bly met die wel en weë van elke besoekpunt ten einde vinnig die nood en behoeftes van lidmate op te vang en deur te kan gee;
- diens doen by die bediening van die nagmaal indien nodig.